O violonchelista Ángel Luis Quintana comeza este xoves día 16 as clases maxistrais do segundo trimestre. En concreto, será o xoves entre as 16:00 e as 20:00 horas e o venres entre as 13:00 e as 14:00 horas, engadindo tamén tres horas, entre as 10:00 e as 13:00 horas do venres para o alumnado. do Curso Superior de Especialización Orquestral.
Longa traxectoria
Ángel Luis Quintana naceu nas Palmas de Gran Canaria, onde comezou os seus estudos musicais. Continuou a súa formación en Madrid, na Escola Superior de Música Reina Sofía. Formouse con profesores como o músico ruso Mstislav Rostropovich, considerado o mellor violonchelista da súa xeración.
Ten numerosos premios polo seu instrumento. Foi solista da Orquestra de RTVE e da Orquestra de Cámara Reina Sofía, profesor do Conservatorio de Guadalaxara e profesor axudante da Escola Reina Sofía. Actualmente é solista da Orquestra Nacional de España, profesor no Conservatorio Superior de Música do Liceo de Barcelona e profesor visitante no Conservatorio de Rotterdam. Dende 2013 é profesor do Curso Universitario Internacional de Música Española “Música en Compostela”.
Xunto aos frautistas Charina Quintana e Giovani Mugnuolo, formou recentemente o Altilia Ensemble e con Corrado Bolsi e Gisella Curtolo o grupo MusicaAperta. Toca un violonchelo J. Guadagnini “Il Soldato” do ano 1800, cedido pola Fundación Colón.
