A Escola de Altos Estudos Musicais (EAEM) acollerá os vindeiros 23 e 24 de abril ao reputado trompista Ignacio García, intérprete e pedagogo de referencia internacional pola súa longa traxectoria orquestral e o seu compromiso coa formación de novas xeracións de músicos.
Formado co mestre Edward Brown —discípulo de John Barrows e Wendell Hoss—, Ignacio García completou os seus estudos en clases maxistrais con Guelfo Nalli, Francis Orval e Dale Clevenger, adquirindo un profundo coñecemento dos estilos americano e alemán da trompa, nos que se move con total naturalidade.
Ao longo da súa carreira como músico de orquestra, colaborou con directores de prestixio mundial como Carlo Maria Giulini, Günther Wand, Lorin Maazel, Claudio Abbado, Zubin Mehta, Simon Rattle e Daniel Barenboim, referencias que influíron de maneira decisiva no seu enfoque artístico.
Ademais da súa actividade como trompa solista da Staatskapelle Berlin, foi convidado habitual da Filharmónica de Berlín, a Filharmónica de Múnic, a Sinfónica da Radio Bávara ou a Chicago Symphony Orchestra, participando en producións e xiras internacionais de grande relevancia.
O seu labor pedagóxico esténdese ao longo de máis de vinte anos, cunha intensa actividade de clases maxistrais en Europa, Asia e América. Desde 1997 é docente da Orchesterakademie da Staatskapelle Berlin. Entre 2002 e 2010 foi mentor da West-Eastern Divan Orchestra, preparando a sección de vento-metal en programas de alta esixencia e impartindo tanto ensaios como clases individuais. Entre 2004 e 2012 foi profesor de trompa na Academia Barenboim-Said de Sevilla.
Desde 2011 imparte clases de trompa, estudos orquestrais e música de cámara na Universidade de Música e Teatro de Rostock, que en 2022 lle concedeu o título de profesor honorario en recoñecemento á súa destacada achega á música e á docencia.
As clases maxistrais na EAEM diríxense a alumnado avanzado e profesionais que queiran afondar na técnica e na interpretación da trompa baixo a guía dun dos grandes especialistas do panorama actual.
