A Escola de Altos Estudos Musicais (EAEM) presenta para o ano 2026 un programa de clases maxistrais que reunirá, entre xaneiro e maio, a algúns dos intérpretes máis recoñecidos do panorama internacional. Os cursos, concebidos para alumnado avanzado e profesionais, abranguen un amplo espectro instrumental e ofrecen unha oportunidade única de aprendizaxe directa con figuras de referencia.
A programación comezará os días 30 e 31 de xaneiro coa violinista Raquel Areal, integrante da Berliner Philharmoniker, quen centrará o seu traballo na técnica avanzada, a calidade sonora e o repertorio solista e orquestral.
Os días 5 e 6 de febreiro, o contrabaixista Edicson Ruiz, tamén membro da Berliner Philharmoniker, impartirá un curso especializado sobre técnica do instrumento, repertorio sinfónico e enfoques interpretativos contemporáneos.
O 7 de febreiro, a flautista Silvia Rozas, flauta principal da Ópera de Hannover e membro da NDR Radiophilharmonie, ofrecerá unha sesión intensiva dedicada ao control do son, expresividade e preparación profesional.
Os días 12 e 13 de febreiro visitará a EAEM o fagotista Hans Agreda, contrafagot solista da Tonhalle de Zúrich, quen traballará aspectos técnicos do fagot e contrafagot, articulación, estilo e práctica orquestral.
En marzo será a quenda da violista Sara Ferrández, que impartirá a súa clase maxistral os días 13 e 14 de marzo. A súa visita á EAEM ofrecerá ao alumnado a oportunidade de traballar cunha artista cunha traxectoria marcada pola excelencia, a innovación e unha intensa actividade camerística e orquestral.
Na primavera, do 15 ao 17 de abril, o prestixioso percusionista Juanjo Guillem, recoñecido especialista na música contemporánea e solista da Orquestra Nacional de España, impartirá un curso centrado na percusión actual, a vanguardia sonora e o repertorio sinfónico.
Os días 23 e 24 de abril tomará o relevo o trompista Ignacio García, solista da Staatskapelle Berlin e profesor na Universidade de Música e Teatro de Rostock, cun programa que combina traballo técnico, enfoques estilísticos e repertorio orquestral.
Por último, os días 15 e 16 de maio, o clarinetista francés Nicolas Baldeyrou, figura destacada no ámbito internacional e especialista tanto en clarinetes modernos como históricos, pechará o ciclo cunhas clases dedicadas á técnica avanzada, interpretación historicamente informada e repertorio solista e camerístico.
Este completo programa consolida a EAEM como un espazo de referencia para o perfeccionamento musical, ofrecendo unha formación de alto nivel da man de artistas e docentes de prestixio mundial.
